,,Hann reynir að komast kurteislega undan stefnumótinu. Hann notar afsakanir, sem hún hefur heyrt milljón sinnum áður.“ : rannsókn um viðhorf samfélagsins til stefnumóta og fötlunar

Á seinustu áratugum hefur átt sér stað vitundarvakning í málaflokki og réttindabaráttu fatlaðs fólks en sú vakning virðist staðna þegar kemur að kynverund þess. Þær hugmyndir um að fatlað fólk sé „eilíf börn“ eða „kynlaus“ virðast enn lifa í samfélaginu og lítið er gert til þess að sporna við þeim. Ekki er minnst á kynverund þegar litið er til laga um réttindi fatlaðs fólks með langvarandi stuðningsþarfir, eða til samnings Sameinuðu þjóðanna um réttindi þess. Fötlun birtist ekki í almennri kynfræðslu og ekki er hugað að því að kynverund fatlaðs fólks sé virt. Svo virðist vera að ekki sé gert ráð fyrir því að það eigi sér tilhugalíf. Niðurstöður rannsóknar, sem lögð var fyrir í tengslum við verkefnið, benda til þess að vitundarvakning virðist vera í samfélaginu varðandi aðgengismál fatlaðs fólks en enn ríkir mikil fáfræði og fordómar þegar horft er til tilhugalífs og kynverundar þess. Niðurstöður rannsóknarinnar sýna einnig að fræðsla og vitundarvakning, tengd kynverund fatlaðs fólks, er gríðarlega mikilvæg til að breyta viðhorfi samfélagsins